1. mortem esse naturalem
Naturale mori magis est quam vivere: vitamQuisque potest, mortem perdere nemo potest.
2. vitae brevitas
Labitur exiguo demissa foramine arenaRestat et in summa iam prope parte nihil.
Praeterit haud aliter lapsis melioribus annis
In nihilum properans vitaque nostra perit.
5Ite, voluptates, procul, o procul ite, caducae:
Crastina lux aufer contigerat quod heri.
3. quod epigrammata sua non sint lasciva
Quod lasciva parum mea sint epigrammata carpiMalo ego quam quod sint illa pudica parum.
4. in nequissimum quempiam
Magnificus qui magna facit si iure vocatur,Esto parvificus tu quia parva facis.
Aut quia cunctorum es bipedum nequissimus, esto
Nomine pravificus conveniente magis.
5. vulgaris in sternutantes vanitas
Nemo si "salvus" pedenti dicit amico,At sternutanti quilibet e populo,
O quam miranda est stulti imprudentia vulgi!
Nonne anima spirans exit utroque modo?
5Sternutet, pedat, ructet quis: dicere quicquam
(Hoc natura facit) desine, turba rudis.
6. in monachos puellae cadaver deglutientes
Parcite virgineum, monachi, temerare pudoremNudaque sarcophago reddite membra suo.
Egregiam stupidi faciem teretesque papillas
Spectatis, ventrem, crura, labella, genas,
5Pubescens sine labe femur, genitalia claustra,
Tergum, umeros, clunes, Pygmalionis ebur.
Si pietas vobis, reverentia siqua pudorque,
Incorruptum esto corpus ut ante fuit.
Sit vivas stuprare satis quascumque potestis:
10Mortua sint saltem corpora tuta decet.
7. cur lascivias epigrammatis suis caveat immiscere
Nullas quod Veneres CupidinesqueNec dicteria nec iocos procaces
Nec convivia delicatiora
Blande miscuerim meis libellis
5Vatum more epigrammatariorum,
Quidam me modo criticus notavit.
Sanctarum ratio est habenda legum,
Quales pro pietate Christiana
Hoc aevo colimus severiore.
10Nunc lascivia turpis improbatur,
Saevis moribus abstinere oportet
Potare et grave crimen helluari est.
Hoc blandus redeat Catullus aevo:
Mellitos oculos tuos, Iuventi,
15Et te, Lesbia, basiare cesset.
Uxor, vade foras, nimis pudica,
Numquam dicere Martialis ausit.
Aetas quaeque suo est colenda more.
8. mensura hominis ex Plinio
A summis digitis spatium dextrae atque sinistraeEst hominis plantas quod summo vertice ad imas.
9. humanae vitae miseria
Hoc nihil in mundo est praeter nascique morique,Interea vero multa sinistra pati.
10. de Faustina
Non est quod gestat collo Faustina monile,Est quae captivos firma catena ligat.
11. de Fortuna
Dat quoi vult, adimit quoi vult Fortuna. Quid ergoTrister? Quod mihi deest cum volet illa dabit.
12. de sua tristitia
Sollicitis frustra caelum mutatur inane,Mens eadem ruri est quae modo in urbe fuit.
Affectata diu turbantes otia curae
Hinc illinc surgunt; nil loca grata iuvant.
5Nunc mihi succurrit quam grandis filia, quam sint
Angusta nati condicione duo,
Quam simul ingentes augescant undique sumptus,
Quam fiant inopi lucra minora foro.
Exhilarant animos Tempe non Thessala tristes;
10Curae absint: quovis dulce manere loco est.
13. ad hirundinem
Quoi (rogo) tam dulces modulos effingis, hirundo,Quoi matutinum garrula dicis "ave"?
Nocte inter lacrimas misere gemitusque peractos,
Lucifero Eoum praeveniente iubar,
5En ego fata queror defuncti tristia nati,
Fletibus assiduis nec modus ullus inest.
Ipsa foves caros solito modulamine fetus:
Heu quanto melior sors tua sorte mea est!
14. ad amicum
Non amo te propter tua munera, dulcis amice:Grata mihi tua sunt munera, te quod amo.
15. de Pamphilo
Quod tua legitimo nupsit Telesina marito,Uxorem quaeres ducere liber homo.
Idem animus mansit, mutatum est, Pamphile, crimen:
Concubitus simplex cessit adulterio.
16. de marito qui cum uxore obiit
Vir poterat iuvenis praesenti enare periclo,Obruta cum vastas prora subiret aquas.
Coniugis amplexu dulcique retentus amore
(Quid non cogit amor?) passus et ipse mori est.
17. contrarium disticho Martialis
Inter quadrupedes vitulus, me iudice, lactens,Inter aves palmam pipio pinguis habet.
Exerce leporem cursu; dare sibila doctus
In cavea turdus nobile munus erit.
18. ad Donatum
At, Donate, mihi dederis si dona frequenterTalia, non Dorus, sed Polydorus eris.
Coeperis iis quaedam si parvis addere magna,
Et Polydorus eris et Megadorus eris!
19. de pace exoptata
Pristina si redeant optatae commoda pacis,Candida si posthac fulgeat ulla dies,
Ausim vicinum fatis imitatus olorem
Non opico quaedam scribere digna sene.
5Sin adversa suo pergit fortuna tenore,
Ingenium stupidus torpor obibit iners.
Dulce melos repetit florenti vere canora
Daulias, hiberno frigore muta silet.
20. obitus catelli Hispani
Dum stimulat trepidos praeceps auriga iugalesEt temere accelerans obvia nulla cavet,
Deliciae Hispano catulus de semine nostrae
Occidit obtritus praetereunte rota.
5At semper quaecumque mihi est oblata voluptas
Protinus ex aliqua parte dolenda venit.
21. quid sit iustitia
Iustitia est constans atque inconcussa voluntasUnicuique suum ius bene distribuens.
22. ornamentum speculi
Quid tantum speculo tumes inani?Hunc fastum cita detrahet senectus.
