Impellebat equum, nec segnis Dardana proles
Hunc sequitur. Patriae procerum dic nomina, Clio,
Quique die cives populi Florentis in illa
Immortale decus tanto pepere labore!
5Horrida Canisius portabat more Quiritum
Pila, tibi unde genus clarum, Florentia, sumpsit
Canisiana domus. Fesulis habitaverat olim
Albinus proavus: duri mox vertice montis
Deserto iuxta campum Munionis amoeni
10Faunigenaeque Arni demigravere Quirites.
Hic inter primas horrentia pila phalanges
Strinxerat: Usdrialoque femur terebravit acuta
Cuspide et Alpicolas, Lamium Climamque, peremit.
Circulus antevolans ingentem Verius hastam
15Torsit in Eugenium; cecidit transfossus uterque,
Eugenius sonipesque, ictu laceratus eodem.
Ecce Altovite decus immortale, Iohannes,
Prolis in hostiles turmas ceu Martius, agnos
Ceu lupus invadit vallumque et retia frangit,
20Impellit iugulatque pecus, sic impiger heros
Irruit et stricto reserat mucrone catervas.
Hunc iuxta insignis Nerius cognomine Pictus
Pugnabat, pictus quod versicoloribus armis,
A quo Tuscorum profluxit Pictia proles.
25Nec Corbinelli cessat dextra inclyta bello
Varnerioque caput, Tesproto cuspide pectus
Fixit et armigerum Nabim cecidit Heroldi.
Nec te carminibus nostris, Biliotte, tacebo:
Cesorum ingentes cumulasti victor acervos.
30Huic comes aegregia insignis pietate Ridolfus
Primus inire manum serusque redire solebat.
Nec te, clare Simon, venientia saecla tacebunt,
Cui Stradae cognomen erat, quod sterneret agmen
Quodque securigera proscinderet omnia dextra.
35Impiaque immanis disrupit tempora Pyrrhi
Sacrilegique femur non uno vulnere Cyrrhi
Hausit. Et Hisatium, qui despilaverat olim
Exarchus Latium, per viscera condidit ensem.
Plurimaque obscurae prostrarat corpora plebis.
40At non segnis erat splendentibus Adimar armis
Perque hostes, perque arma furens umbone catervas
Exturbabat agens secum, ceu vis helephantis,
Quem pavor et docilis saevum rapit ira magistri.
Bisdominusque ferox longoque Tolosa veruto
45...
This text is part of:
Click on a word to bring up parses, dictionary entries, and frequency statistics
Carlias, appendix (N. Thurn, 1995).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.