1. Ad lectorem
Qui cupit obsessam Gallis, terraque marique,Crinibus abscissis cernere Parthenopen;
Sirenesque alias flentes, nymphasque per omneis
Anfractus pulsas patria flere loca;
5Occlusumque antro disrupta et funditus urna,
Sebethum lachrymis ora rigare novis;
Et pariter lauros, myrtos et citrea rura
(Pro facinus) positis collachrymare comis;
Regibus et Musis fontes et praedia sacra
10Diruta ab hostili quaeque iacere manu;
Et castra, obsessis iam iam quae mille parabant
Funera, vincla, cruces, captaque caesa simul:
Principis aonidum legat haec monimenta Camilli,
Belligeros nati tollere in astra duces.
15Tuque tuos longos Siren solare labores,
Namque uno aeterna et libera facta die es.
2. Ad Caesarem
Gallorum cepisse duces regemque superbum,Solvere Parthenopen obsidione, fame:
Haec te sal notum duplex victoria fecit
Quaque patent terrae, quaque patent maria.
5Sed vicisse trucem romani nominis hostem,
Quem capiet, Caesar, tertia palma locum?
3. Ad Parthenopen
Iam sileat iactare fidem flammasque Saguntum,Massilia obsidium, moenia hetrusca famem.
Caesareis nam sponte sua fidissima signis,
Parthenope his voluit horridiora pati.
5Plaude tamen, quoniam datur, ut si barbara castra
Te lacerent semper, semper humare tuum est.
4. De aulo pyrrho cicada
Quis modo rauco sono cunctas strepere ore cicadasDicat, vel querulo taedia ferre sono?
En hunc nonne putet qui audit tam dulce canentem
Sirenum lepidos exuperare sonos?
5Laudat, amat, queritur, rogat, impetrat omnia versu,
Flectit et argutae dexteritate lyrae.
Unde Paphum Cyprumque simul Venus atque Cupido
Idalium et Charites deseruere nemus
Nec cupiunt alio lachrymas, suspiria posthae
10Non alio flammas dicier ore suas.
