Longo tam siluit tecum mea tempore musa
Ut tacitum pleno carpere iure quaeas:
Quid faciam? cecinisse iuvat, mens ardet ad ipsa
Carmina, carminibus maior es ipse meis.
5Non ego sum, cuius pronostica carmen in ore,
Infans vagitus dum daret, egit avis;
Aemula praelusit vati Philomela futuro
Lac velut instillans dulce canora melos;
Infans nec fateor cuius Hymettia labris
10Saepe laboriferae mella tulistis apes.
Versibus his blandis valuit citharaque canora
Phoebea longe nec minor arte fuit.
Alter ob ingenium facundaque dulcius ora
Artifices vicit ingeniosus apes.
15Cur non Stesichori detur phorminge valere
Aut velut altisonus condere verba Plato?
Ille vel ille tuis me plus est laudibus aptus
Aptus et est factis ille vel ille tuis.
Protinus huc o si redeas Federice, vel alter
20Te iam Stesichorus vel Plato dignus erit;
Invenies operam divinaque tempora musis,
Et Phoebo qui dent otia pulchra suo.
Quid differs? accede suus, spes ampla, meusque
Si mea quid vivae carmina vocis habent:
25Praeludam magnis de te, Federice, poetis
Et dux egregiis vatibus unus ero:
Non aliter quam cum longo ordine saepe cameli,
Ad patrios Arabum fertis aroma Lares
Aut alias merces loca per deserta solumque
30Exustum incertas et sine calle vias.
Grandia saepe bonus dux agmina praeit asellus
Magnaque quo pergat bellua parva docet.
Non erit a nobis exempla capessere turpe
Quique tuam fari temptet et arma togam.
35Huc ades: incepte scribi per compita laudes
Perque forum medium templa per alta sonant.
Te nam vulgus amat et certe dignus amari
Qui bene quam belli tam bene pace vales
Vera loquar tu vera putes ab amante referri,
40Falli cum possit fallere nescit amans.
Absentem praesens populum spe certius imples
Pendet et in vultus Insubres ora tuos.
Tertia nobiscum te iam non invenit aestas
Et tria sunt certe saecula visa mihi
45Una dies unum nobis iam computat annum,
Si non est anno longior una dies:
Si redeas, rediisse diem cum sole putabo,
Ergo redi, mea lux, solque diesque redi.
This text is part of:
Click on a word to bring up parses, dictionary entries, and frequency statistics
carmen (A. Cinquini, 1907).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.