1
Iam summum Superis lacrimis imponere finem
Aspicio placuisse meis. iam vela pudorque
Ex oculis iam iamque excedere mente dolores
Vi certant. dubiumque michi non restat habendum
5Quin mea felici ducatur vita sub evo
Et solito sub iure regam, quin Tuscia tota
Sponte sua veniat sancto dyademate crines
Ornatura meos posituraque colla catenis.
Presidio pompose urbis cessere Senarum
10Hec michi. me nimium Perusina superbia iuvit
Consilioque suo texit me callida vulpes;
Me Vice defendit dominus Comes ipse Iohanes
Magnaque ni fuerit sua gens peritura fuissem.
Hec michi retribuenda manent. his reddere grates
15Dii faxint valeam dignas. quid dicite? quid vos
Tantus agit furor internam sic velle ruinam,
Precipitare manus, et vestras vertere vires?
Quid delere iuvat fratres sic velle et amicos
Odisse ignoteque caput submictere genti?
20Credite: mors mea vestra est, et ni parcere vincat
Vivere preteriti foret ampla pigentia facti.
Vivo equidem; vivit regum celeberrima proles
Spes mea certa salus, multosque reliquit amicos
Innumeros fortuna michi. Malatesta virescit
25Progenies que semper ego fuit altera mente.
Est ibi consilium, probitas, prudentia, mores.
Ergo quid incassum tantum dimictis anhelum
Et tantum latrare iuvat? frustrane putastis
Bella capi tot ubi proceres, ubi copia tanti
30Militis, aut ubi magnanimus Pandulfus adesset?
Quis duce sub tanto certe presagia palme
Non habeat magnoque equet sua facta Catoni?
Quis Cocles alius in ponte? quis alter in armis
Scipio? consilio quis acutior alter Ulixes?
35Ite mei servate virum, mea gloria, cives;
Ite citi et fratri vos oscula figite digna,
Semper et unanimes rebus secum este secundis
Sic et in adversis. ego tunc Florentia felix
Ante alias vivam Tuscamque tenebo coronam.
This text is part of:
Click on a word to bring up parses, dictionary entries, and frequency statistics
1 in personam civitatis Florentie | fugata sotietate Teutonicorum loquentis
in persona civitatis Florentie (R. C. Jensen, 1973).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.