This text is part of:
Click on a word to bring up parses, dictionary entries, and frequency statistics
4.
Miserat et Mucianus epistulas ad senatum, quae materiam sermonibus praebuere. si privatus esset, cur publice
loqueretur? potuisse eadem paucos post dies loco sententiae dici. ipsa quoque insectatio in Vitellium sera et sine
libertate: id vero erga rem publicam superbum, erga principem contumeliosum, quod in manu sua fuisse imperium donatumque Vespasiano iactabat. ceterum invidia in occulto,
adulatio in aperto erant: multo cum honore verborum Muciano
triumphalia de bello civium data, sed in Sarmatas expeditio
fingebatur. adduntur Primo Antonio consularia, Cornelio
Fusco et Arrio Varo praetoria insignia. mox deos respexere;
restitui Capitolium placuit. eaque omnia Valerius Asiaticus
consul designatus censuit: ceteri vultu manuque, pauci,
quibus conspicua dignitas aut ingenium adulatione exercitum,
compositis orationibus adsentiebantur. ubi ad Helvidium Priscum praetorem designatum ventum, prompsit sententiam ut
honorificam in bonum principem, ... falsa aberant, et studiis
senatus attollebatur. isque praecipuus illi dies magnae offensae initium et magnae gloriae fuit.
Historiae. Cornelius Tacitus. Charles Dennis Fisher. Clarendon Press. Oxford. 1911.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.