Click on a word to bring up parses, dictionary entries, and frequency statistics
4.
Moyses quo sibi in posterum gentem firmaret, novos
ritus contrariosque ceteris mortalibus indidit. profana illic
omnia quae apud nos sacra, rursum concessa apud illos quae
nobis incesta. effigiem animalis, quo monstrante errorem
sitimque depulerant, penetrali sacravere, caeso ariete velut
in contumeliam Hammonis; bos quoque immolatur, quoniam
Aegyptii Apin colunt. sue abstinent memoria cladis, quod ipsos
scabies quondam turpaverat, cui id animal obnoxium. longam olim famem crebris adhuc ieiuniis fatentur, et raptarum
frugum argumentum panis Iudaicus nullo fermento detinetur.
septimo die otium placuisse ferunt, quia is finem laborum tulerit; dein blandiente inertia septimum quoque annum ignaviae datum. alii honorem eum Saturno haberi, seu principia
religionis tradentibus Idaeis, quos cum Saturno pulsos et
conditores gentis accepimus, seu quod de septem sideribus,
quis mortales reguntur, altissimo orbe et praecipua potentia stella Saturni feratur, ac pleraque caelestium viam suam
et cursus septenos per numeros commeare.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.