32. nuper is homo fuit in civitate P. Sulla ut nemo
ei se neque honore neque gratia neque fortunis anteferret,
nunc spoliatus omni dignitate quae erepta sunt non repetit;
quod fortuna in malis reliqui fecit, ut cum parente, cum
liberis, cum fratre, cum his necessariis lugere1 suam calamitatem
liceat, id sibi ne eripiatis vos, iudices, obtestatur.
[90]
te
ipsum iam, Torquate, expletum huius2 miseriis esse3 par erat4
et, si5 nihil aliud Sullae nisi consulatum abstulissetis, tamen
eo vos contentos6 esse oportebat; honoris enim contentio
vos ad causam, non inimicitiae deduxerunt. sed cum huic
omnia cum honore detracta sint, cum in hac fortuna miserrima7
ac luctuosissima destitutus sit8, quid est quod expetas9
amplius? Lucisne hanc usuram eripere vis10 plenam lacrimarum
atque maeroris, in qua cum maximo cruciatu ac11
dolore retinetur? libenter reddiderit adempta ignominia
foedissimi criminis. an vero inimicum ut expellas? cuius
ex miseriis, si esses crudelissimus, videndo fructum caperes
maiorem12 quam audiendo.
[91]
O miserum et infelicem illum
diem quo consul omnibus centuriis P. Sulla renuntiatus est,
o falsam spem, o volucrem fortunam, o caecam cupiditatem,
o praeposteram gratulationem! quam cito illa omnia ex
laetitia et voluptate ad luctum et lacrimas recciderunt13, ut,
qui paulo ante consul designatus fuisset, repente nullum
vestigium retineret14 pristinae dignitatis! quid enim erat
mali quod huic spoliato fama, honore15, fortunis deesse videretur?
aut cui novae calamitati locus ullus relictus16? Vrget
eadem fortuna quae coepit, repperit novum maerorem, non
patitur hominem calamitosum uno malo17 adflictum uno in
luctu perire.
Click on a word to bring up parses, dictionary entries, and frequency statistics
1 lugere TEπab1: iungere cett.
5 et si πaσψ, Müller: etsi cett.
7 miserrima TE: misera cett.
8 sit est E
9 expetas E: expectas (-es πc) cett.
11 ac TEb: atque cett.
12 maiorem caperes E
13 recc. Zielinski: rec. codd.
14 retineret hoc loco hab. TE, post fuisset (om. repente a) cett.
15 fama honore TEπ: honore fama cett.
16 relictus esset (est b1: esse cod. H. Stephani) add. codd.: ego delevi
17 malo TE: modo cett.
M. Tullius Cicero. M. Tulli Ciceronis Orationes: Recognovit brevique adnotatione critica instruxit Albertus Curtis Clark. Albert Clark. Oxonii. e Typographeo Clarendoniano. 1909. Scriptorum Classicorum Bibliotheca Oxoniensis.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.