Titus Livius (Livy), The History of Rome, Book 39
W. Weissenborn, Ed.

19. aliud deinde huic coniunctum referente Q. Marcio consule senatus consultum factum est, ut de iis, quos pro indicibus consules habuissent, integra res ad senatum referretur, cum Sp. Postumius quaestionibus perfectis Romam redisset. [2] [p. 37]Minium Cerrinium Campanum Ardeam in vincula mittendum censuerunt magistratibusque Ardeatium praedicendum, ut intentiore eum ¹custodia adservarent, non solum ne effugeret, sed ne mortis consciscendae locum haberet. [3] Sp. Postumius aliquanto post Romam venit; eo referente de P. Aebuti et Hispalae Feceniae praemio, quod eorum opera indicata Bacchanalia essent, senatus consultum factum est, [4] uti singulis his centena milia aeris quaestores urbani ex aerario darent; utique consul cum tribunis plebis ageret, uti ad plebem primo quoque tempore ferrent, ut P. Aebutio emerita stipendia essent, ne invitus militaret, neve censor ei ... equum publicum adsignaret; [5] [p. 38] utique Feceniae Hispalae datio deminutio gentis enuptio tutoris optio item esset, quasi ei vir ²testamento dedisset, utique ei ingenuo nubere liceret, neu quid ei, qui eam duxisset, ob id fraudi ignominiaeve esset; [6] utique consules praetoresque, qui nunc essent, quive postea futuri essent, curarent, ne quid ei mulieri iniuriae fieret, utique tuto esset. [7] id senatum velle et aequum censere, ut ita fieret. ea omnia lata ad plebem factaque sunt ex senatus consulto; et de ceterorum indicum inpunitate praemiisque consulibus permissum est.