1
Incola fatidicum sancti cui nomen Ythomi
Cognomen rarum cui tulit alma fides,
Cara patris soboles, cui cum Iunone Minerva
Iudicio Paridis cedet et ipsa Venus,
5Sidereis dotata oculis, cui vultus obumbrat
Gaemeus, aligeri nidus et aula dei,
Artibus excellens Zenonis, Stagyritis adhausta
Quicquid inoffense pagina longa docet,
Gloria Pierias inter recidiva puellas,
10Et saeculi et sexus gloria prima tui,
Spectata virtute micans, probitate refulgens
Ingenua, Latii sidus et urbis honor,
Cantibus andinis cum sis dignissima virgo
Heu, quod mi puero nulla Camoena favet.
15Optatis vates numeris cecinere puellas
Laethei ut fugerent impia fata lacus.
Praecipuam lepidus dilexit Naso Corinnam
Qua Latiis exul tristia flevit aquis;
Cynthia verbosis veneres iniuxit ocellis
20Scribere vix fuerat cui bene notus amor.
Saepe tibullino spectatur Delia versu;
Barbiton ocnaei Lydia vatis amat.
Atractis revocas nervis dum Galle Lycorim
Praelia (proripiens se) lachrymosa petit.
25Aeditui tandem miserata est Pamphila flammas,
Cive meo gaudens Lesbia nocte caret.
Aesonidae grandi cursus qui luserat aestro
Deperiens (posuit classica) Leucadiam,
Battiades Lyden, Battim canit ipse Philaetas
30Exactor vatum qui modo durus erat.
Priscorum Anthymachus miserando carmine deflet
Funere, Lysidicen ne gemat usque suam.
Asteriden Patavii duram pia pagina vicit,
Quintiliam tenuis quam lyra, Calve, iuvat;
35Panthia cantavit vix te Beroaldus, adurit
Quem nimis ardenti Martia saeva face;
Aurelii Glycere, Cylenii Mylphya vestris
Est nuper variis utraque victa modis.
Flendo meus Montagna nimis Leonardus acerbum
40Vivere te, extincta Bartolomaea, vocat.
Dante Beatrices cantatur; Laura Petrarcha,
Fervida qui patriae plectra fuere lyrae.
Vatis opem tuam cum poscant praeconia magni,
Virgo, fave; vates te duce summus ero.
45Praeclaros foveat quamvis pia Musa poetas,
Cura mihi est laudis, Musa benigna, tuae.
Carbasa det pavido quamvis mea cymbula ponto,
Tuta petam, partes quod nisi quaero tuas.
Nihil cum Marte mihi; claros canat ille triumphos,
50Astruat hic stupido mira videnda foro
Quid tandem roboant? Quod non vidisse semel sit
Et satis atque super et satis atque super.
Nil non saepe canit qui Caesaris acta relatum
Iliaca quae non pagina caede madet.
55Hyppodromo tantum laudum sudare tuarum
Gestio, ne caveas vivere, virgo, cave.
Mihi credas, capior iam totus Apolline, iam me
Agnoscit vatem turba novena suum.
Grata licet cupio seponere dogmata, quondam
60Sic repetam argutae fila relicta chelis,
Sic mea praestantes revocabunt plectra Marones
Me duce sic nomen vivet in astra tuum.
Exeret Euganeae cervicem gloria gentis
Quam nova quod veneta nomen ab urbe dabis,
65Si mea plectra coles titulorum fama tuorum
Emittet pennas aurea candidulas.
Ergo age perpetua superes ut voce, futuri
Calliopaea tui carmina vatis ama
Iamque vale: haec celeri quae lusi pectine, noti
70Primitiae atque animi sint monumenta mei.
This text is part of:
Click on a word to bring up parses, dictionary entries, and frequency statistics
1 Divae Cassandrae Fideli Venetae virgini eloquentissimae | ac probis omnibus artibus eminentissimae | Hieronymus Avancius Veronensis
ad Cassandram Fidelem (D. Cascasi, tesi di laurea Università di Padova, 1973-74).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.