Click on a word to bring up parses, dictionary entries, and frequency statistics
[38]
Ego vero si velim
et nostrae civitatis exemplis uti et aliarum, plura proferre
possim detrimenta publicis rebus quam adiumenta, per
homines eloquentissimos importata; sed ut reliqua praetermittam,
omnium mihi videor, exceptis, Crasse, vobis duobus,
eloquentissimos audisse Ti. et C. Sempronios, quorum pater,
homo prudens et gravis, haudquaquam eloquens, et saepe
alias et maxime censor saluti rei publicae fuit: atque is non
accurata quadam orationis copia, sed nutu atque verbo
libertinos in urbanas tribus transtulit, quod nisi fecisset,
rem publicam, quam nunc vix tenemus, iam diu nullam
haberemus. At vero eius filii diserti et omnibus vel
naturae vel doctrinae praesidiis ad dicendum parati, cum
civitatem vel paterno consilio vel avitis armis florentissimam
accepissent, ista praeclara gubernatrice, ut ais, civitatum
eloquentia rem publicam dissipaverunt.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.