M. Tullius Cicero, For Milo
Albert Clark, Albert Curtis Clark, Ed.

2. unum genus est adversum infestumque nobis eorum quos P. Clodi furor rapinis et incendiis et omnibus exitiis publicis pavit; qui hesterna etiam contione incitati sunt ut vobis voce praeirent quid iudicaretis. quorum clamor si qui forte fuerit, admonere vos debebit ut eum civem retineatis qui semper genus illud¹ hominum clamoresque maximos prae² vestra salute neglexit. [4] quam ob rem adeste animis, iudices, et timorem, si quem habetis, deponite. nam si umquam³ de bonis et fortibus viris, si umquam de bene meritis civibus potestas vobis⁴ iudicandi fuit, si denique umquam locus amplissimorum ordinum delectis viris datus est ut sua studia erga fortis et bonos civis⁵, quae voltu et verbis saepe significassent, re et sententiis declararent, hoc profecto tempore eam potestatem omnem vos habetis ut statuatis utrum nos qui semper vestrae auctoritati dediti fuimus semper miseri lugeamus an diu vexati a perditissimis civibus aliquando per vos ac per vestram fidem, virtutem sapientiamque recreemur. [5] quid enim nobis duobus⁶, iudices, laboriosius, quid magis sollicitum, magis exercitum⁷ dici aut fingi potest, qui spe amplissimorum praemiorum ad rem publicam adducti metu crudelissimorum suppliciorum carere non possumus? equidem ceteras tempestates et procellas in illis dumtaxat fluctibus contionum semper putavi Miloni esse subeundas, quia semper pro bonis contra⁸ improbos senserat, in iudicio vero et in eo consilio in quo ex coniunctis⁹ ordinibus amplissimi viri iudicarent numquam existimavi spem ullam esse habituros Milonis inimicos ad eius¹⁰ non modo salutem exstinguendam sed etiam gloriam per talis viros infringendam. [6] quamquam in hac causa iudices, T. Anni tribunatu rebusque¹¹ omnibus pro salute rei publicae gestis ad huius criminis defensionem non abutemur. Nisi oculis videritis insidias Miloni a Clodio esse¹² factas, nec deprecaturi sumus ut crimen hoc nobis propter multa praeclara in rem publicam merita condonetis, nec postulaturi ut, quia¹³ mors P. Clodi salus vestra fuerit, idcirco eam virtuti Milonis potius quam populi Romani felicitati adsignetis. sin¹⁴ illius insidiae clariores hac luce fuerint, tum denique obsecrabo obtestaborque vos, iudices, si cetera amisimus, hoc nobis¹⁵ saltem ut relinquatur, vitam¹⁶ ab inimicorum audacia telisque ut impune liceat defendere.