Euripides, Electra
Gilbert Murray, Ed.

Ὀρέστης

φεῦ:
γενναῖον ἄνδρ᾽ ἔλεξας, εὖ τε δραστέον.

Ἠλέκτρα

εἰ δή ποθ᾽ ἥξει γ᾽ ἐς δόμους ὁ νῦν ἀπών.

Ὀρέστης

μήτηρ δέ σ᾽ ἡ τεκοῦσα ταῦτ᾽ ἠνέσχετο;

Ἠλέκτρα

265γυναῖκες ἀνδρῶν, ὦ ξέν᾽, οὐ παίδων φίλαι.

Ὀρέστης

τίνος δέ σ᾽ οὕνεχ᾽ ὕβρισ᾽ Αἴγισθος τάδε;

Ἠλέκτρα

τεκεῖν μ᾽ ἐβούλετ᾽ ἀσθενῆ, τοιῷδε δούς.

Ὀρέστης

ὡς δῆθε παῖδας μὴ τέκοις ποινάτορας;

Ἠλέκτρα

τοιαῦτ᾽ ἐβούλευσ᾽: ὧν ἐμοὶ δοίη δίκην.

Ὀρέστης

270οἶδεν δέ σ᾽ οὖσαν παρθένον μητρὸς πόσις;

Ἠλέκτρα

οὐκ οἶδε: σιγῇ τοῦθ᾽ ὑφαιρούμεσθά νιν.

Ὀρέστης

αἵδ᾽ οὖν φίλαι σοι τούσδ᾽ ἀκούουσιν λόγους;

Ἠλέκτρα

ὥστε στέγειν γε τἀμὰ καὶ σ᾽ ἔπη καλῶς.

Ὀρέστης

τί δῆτ᾽ Ὀρέστης πρὸς τόδ᾽, Ἄργος ἢν μόλῃ;

Ἠλέκτρα

275ἤρου τόδ᾽; αἰσχρόν γ᾽ εἶπας: οὐ γὰρ νῦν ἀκμή;

Ὀρέστης

ἐλθὼν δὲ δὴ πῶς φονέας ἂν κτάνοι πατρός;

Ἠλέκτρα

τολμῶν ὑπ᾽ ἐχθρῶν οἷ᾽ ἐτολμήθη πατήρ.

Ὀρέστης

ἦ καὶ μετ᾽ αὐτοῦ μητέρ᾽ ἂν τλαίης κτανεῖν;

Ἠλέκτρα

ταὐτῷ γε πελέκει τῷ πατὴρ ἀπώλετο.

Ὀρέστης

280λέγω τάδ᾽ αὐτῷ, καὶ βέβαια τἀπὸ σοῦ;

Ἠλέκτρα

θάνοιμι μητρὸς αἷμ᾽ ἐπισφάξασ᾽ ἐμῆς.

Ὀρέστης

φεῦ:
εἴθ᾽ ἦν Ὀρέστης πλησίον κλύων τάδε.

Ἠλέκτρα

ἀλλ᾽, ὦ ξέν᾽, οὐ γνοίην ἂν εἰσιδοῦσά νιν.

Ὀρέστης

νέα γάρ, οὐδὲν θαῦμ᾽, ἀπεζεύχθης νέου.

Ἠλέκτρα

285εἷς ἂν μόνος νιν τῶν ἐμῶν γνοίη φίλων.

Ὀρέστης

ἆρ᾽ ὃν λέγουσιν αὐτὸν ἐκκλέψαι φόνου;

Ἠλέκτρα

πατρός γε παιδαγωγὸς ἀρχαῖος γέρων.

Ὀρέστης

ὁ κατθανὼν δὲ σὸς πατὴρ τύμβου κυρεῖ;

Ἠλέκτρα

ἔκυρσεν ὡς ἔκυρσεν, ἐκβληθεὶς δόμων.

Ὀρέστης

290οἴμοι, τόδ᾽ οἷον εἶπας: — αἴσθησις γὰρ οὖν
κἀκ τῶν θυραίων πημάτων δάκνει βροτούς.
λέξον δ᾽, ἵν᾽ εἰδὼς σῷ κασιγνήτῳ φέρω
λόγους ἀτερπεῖς, ἀλλ᾽ ἀναγκαίους κλύειν.
ἔνεστι δ᾽ οἶκτος ἀμαθίᾳ μὲν οὐδαμοῦ,
295σοφοῖσι δ᾽ ἀνδρῶν: καὶ γὰρ οὐδ᾽ ἀζήμιον
γνώμην ἐνεῖναι τοῖς σοφοῖς λίαν σοφήν.

Χορός

κἀγὼ τὸν αὐτὸν τῷδ᾽ ἔρον ψυχῆς ἔχω.
πρόσω γὰρ ἄστεως οὖσα τἀν πόλει κακὰ
οὐκ οἶδα, νῦν δὲ βούλομαι κἀγὼ μαθεῖν.