Click on a word to bring up parses, dictionary entries, and frequency statistics
81.
Ante idus Iulias Syria omnis in eodem sacramento
fuit. accessere cum regno Sohaemus haud spernendis viribus,
Antiochus vetustis opibus ingens et servientium regum ditissimus. mox per occultos suorum nuntios excitus ab urbe
Agrippa, ignaro adhuc Vitellio, celeri navigatione properaverat. nec minore animo regina Berenice partis iuvabat,
florens aetate formaque et seni quoque Vespasiano magnificentia munerum grata. quidquid provinciarum adluitur mari
Asia atque Achaia tenus, quantumque introrsus in Pontum
et Armenios patescit, iuravere; sed inermes legati regebant,
nondum additis Cappadociae legionibus. consilium de summa
rerum Beryti habitum. illuc Mucianus cum legatis tribunisque
et splendidissimo quoque centurionum ac militum venit, et e
Iudaico exercitu lecta decora: tantum simul peditum equitumque et aemulantium inter se regum paratus speciem fortunae principalis effecerant.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.