[36]
praetor interea, Piso, tanta de re tacebit? quem ad modum
te restituat in aedis tuas non habebit? qui dies totos aut
vim fieri vetat aut restitui factam iubet, qui de fossis, de
cloacis, de minimis aquarum itinerumque controversiis interdicit,
is repente obmutescet, in atrocissima re quid faciat
non habebit? et C. Pisoni domo tectisque suis prohibito,
prohibito inquam, per homines coactos et armatos, praetor
quem ad modum more et exemplo opitulari possit non
habebit? quid enim dicet, aut quid tu tam insigni accepta
iniuria postulabis? 'Vnde vi prohibitus?' sic nemo umquam
interdixit; novum est, non dico inusitatum, verum
omnino inauditum. 'Vnde deiectus?' quid proficies,
cum illi hoc respondebunt tibi quod tu nunc mihi, armatis
se tibi obstitisse ne in aedis accederes; deici porro nullo
modo potuisse qui non accesserit?
This text is part of:
Click on a word to bring up parses, dictionary entries, and frequency statistics
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.