Click on a word to bring up parses, dictionary entries, and frequency statistics
ἄλλος δέ τις αὐτῶν ὑπόμνημα τῶν γεγονότων
γυμνὸν συναγαγὼν ἐν γραφῇ κομιδῇ πεζὸν καὶ
χαμαιπετές, οἷον καὶ στρατιώτης ἄν τις τὰ καθ᾽ ἡμέραν
ἀπογραφόμενος συνέθηκεν ἢ τέκτων ἢ κάπηλός τις συμπερινοστῶν
τῇ στρατιᾷ. πλὴν ἀλλὰ μετριώτερός γε ὁ
ἰδιώτης οὗτος ἦν, αὐτὸς μὲν αὐτίκα δῆλος ὢν οἷος ἦν,
ἄλλῳ δέ τινι χαρίεντι καὶ δυνησομένῳ ἱστορίαν μεταχειρίσασθαι
προπεπονηκώς. τοῦτο μόνον ᾐτιασάμην αὐτοῦ,
ὅτι οὕτως ἐπέγραψε τὰ βιβλία τραγικώτερον ἢ κατὰ τὴν
τῶν συγγραμμάτων τύχην: ‘Καλλιμόρφου ἰατροῦ τῆς
τῶν κοντοφόρων ἕκτης ἱστοριῶν Παρθικῶν:’ καὶ ὑπεγέγραπτο
[25]
ἑκάστῃ ὁ ἀριθμός. καὶ νὴ Δία καὶ τὸ προοίμιον
ὑπέρψυχρον ἐποίησεν οὕτως συναγαγών: οἰκεῖον εἶναι
ἰατρῷ ἱστορίαν συγγράφειν, εἴ γε ὁ Ἀσκληπιὸς μὲν Ἀπόλλωνος
[p. 11]
υἱός, Ἀπόλλων δὲ Μουσηγέτης καὶ πάσης παιδείας
ἄρχων: καὶ ὅτι ἀρξάμενος ἐν τῇ Ἰάδι γράφειν οὐκ
οἶδα ὅ τι δόξαν αὐτίκα μάλα ἐπὶ τὴν κοινὴν μετῆλθεν,
ἰητρείην μὲν λέγων καὶ πείρην καὶ ὁκόσα καὶ νοῦσοι, τὰ
δ᾽ ἄλλα ὁμοδίαιτα τοῖς πολλοῖς καὶ τὰ πλεῖστα οἷα ἐκ τριόδου.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.