This text is part of:
Click on a word to bring up parses, dictionary entries, and frequency statistics
En þessu næst kallar konungr saman alla sína menn.
Hann mælti þá til Úlfkels snillings ok Hálfdanar, sonar
síns: "Svá er mál með vexti," sagði hann, "at Skúli
jarl ræðr fyrir norðr í Álaborg. Þar er á fóstri með
honum Ingigerðr, dóttir Hergeirs konungs. Skúli er
kappi mikill, ok er oss ván, at hann muni koma á
hendr oss með her. Því skulu þit fara austr á mót honum
ok leggja landit undir ykkr, en færa mér konungsdóttur,
ok ef þit getið unnit landit, þá skal Úlfkell
vera þar jarl fyrir drengiliga fylgd, er hann hefir mér
fylgt, ok skal ek fá honum sæmiligt kvánfang, en Hálfdan
skal eiga Ingigerði, ef honum hugnast þat ráð.
Þeir bjuggu nú her sinn Úlfkell ok Hálfdan ok léttu
eigi fyrr en þeir koma til Álaborgar.
Hálfdanar saga Eysteinssonar. Guðni Jónsson and Bjarni Vilhjálmsson. Reykjavík. Bókaútgáfan Forni. 1943-1944.
