P. Terentius Afer (Terence), Eunuchus
Edward St. John Parry, Edward St. John Parry, M.A., Ed.

Ch.

Apud Antiphonem uterque, mater et pater,

Quasi dedita opera domi erant, ut nullo modo

Introire possem quin viderent me. Interim

Dum ante ostium sto, notus mihi quidam obviam

5Venit. Ubi vidi, ego me in pedes quantum queo

In angiportum quoddam desertum; inde item

In aliud, inde in aliud: ita miserrimus

Fui fugitando ne quis me cognosceret.

Sed estne haec Thais quam video? Ipsa est. Haereo.

10Quid faciam? quid mea autem? quid faciet mihi?

Th.

Adeamus. Bone vir Dore salve. Die mihi,

Aufugistine?

Ch.
Hera, factum.

Th.
Satin id tibi placet?

Ct.

Non.

Th.
Credin te impune habiturum?

Ch.
Unam hanc noxiam

Mitte: si aliam admisero umquam, occidito.

Tt.

15Num meam saevitiam veritus es?

Ch.
Non.

Th.
Quid igitur?

Ch.

Hanc metui ne me criminaretur tibi.

Th.

Quid feceras?

Ch.
Paulum quiddam.

Py.
Eho, paulum, impudens?

An paulum hoc esse tibi videtur, virginem

Vitiare civem?

Ch.
Conservam esse credidi.

Py.

20Conservam? Vix me contineo quin involem in

Capillum. Monstrum etiam ultro derisum advenit.

Th.

Abin hinc, insana?

Py.
Quid ita vero? debeam,

Credo, isti quicquam furcifero, si id fecerim;

Praesertim cium se servum fateatur tuum.

Th.

25Missa haec faciamus. Non te lignum, Chaerea,

Fecisti; nam etsi ego digna hac contumelia

Sum maxime, at tu indignius qui faceres tamen.

Neque edepol quid nunc consili capiam scio

De virgine istac: ita conturbasti mihi

30Rationes omnes, ut eam non possim suis,

Ita ut aequum fuerat atque ut studui, tradere,

Ut solidum parerem hoc mihi beneficium, Chaerea.

Ch.

At nunc dehinc spero aeternam inter nos gratiam

Fore, Thais. Saepe ex huiusmodi re quapiam et

35Malo principio magna familiaritas

Conflata est. Quid si hoc quispiam voluit Deus?

Th.

Equidem pol in eam partem accipioque et volo.

Ch.

Immo ita quaeso. Unum hoc scito; contumeliae

Non me fecisse causa sed amoris.

Th.
Scio;

40Et pol propterea magis nunc ignosco tibi.

Non adeo inhumano ingenio sum, Chaerea,

Neque ita imperita ut quid amor valeat nesciam.

Ch.

Te quoque iam, Thais, ita me Di bene ament, amo.

Py.

Tum pol tibi ab istoc, hera, cavendum intelligo.

Ch.

45Non ausim.

Py.
Nihil tibi quicquam credo.

Th.
Desinas.

Ch.

Nunc ego te in hac re mihi oro ut adiutrix sies:

Ego me tuae commendo et committo fidei;

Te mihi patronam capio, Thais; te obsecro.

Emoriar si non hanc uxorem duxero.

Th.

50Tamen si pater----.

Ch.
Quid? ah volet, certo scio;

Civis modo haec sit.

Th.
Paululum opperirier

Si vis, iam frater ipse hic aderit virginis:

Nutricem arcessitum it quae illam aluit parvulam.

In cognoscendo tute ipse aderis, Chaerea.

Ch.

55Ego vero maneo.

Th.
Vin interea, dum is venit,

Domi opperiamur potius quam hic ante ostium?

Ch.

Immo percupio.

Py.
Quam tu rem actura obsecro es?

Th.

Nam quid ita?

Py.
Rogitas? hunc tu in aedes cogitas

Recipere posthac?

Th.
Cur non?

Py.
Crede hoc meae fidei;

60Dabit hic aliquam pugnam denuo.

Th.
Au tace obsecro.

Py.

Parum perspexisse eius videre audaciam.

Ch.

Non faciam, Pythias.

Py.
Non pol credo, Chaerea,

Nisi si commissum non erit.

Ch.
Quin Pythias,

Tu me servato.

Py.
Neque pol servandum tibi

65Quicquam dare ausim, neque te servare: apage te.

Th.

Adest optime ipse frater.

Ch.
Perii hercle: obsecro,

Abeamus intro Thais: nolo me in via

Cum hac veste videat.

Th.
Quamobrem tandem? an quia pudet?

Ch.

Id ipsum.

Py.
Id ipsum? Virgo vero.

Th.
I prae; sequor.

70Tu istic mane, ut Chremem introducas, Pythias.