This text is part of:
Click on a word to bring up parses, dictionary entries, and frequency statistics
52. ita cum percensuisset Thessaliam, per Epirum Oricum, unde erat traiecturus, venit.
[2]
ab Orico copiae omnes Brundisium transportatae. inde per totam Italiam ad urbem prope triumphantes non minore agmine rerum captarum quam suo prae se acto venerunt.
[3]
[p. 167] postquam Romam ventum est, senatus extra urbem Quinctio ad 1res gestas edisserendas datus est triumphusque meritis ab lubentibus decretus.
[4]
triduum triumphavit. die primo arma, tela signaque aerea et marmorea transtulit, plura Philippo adempta, quam quae ex civitatibus ceperat; secundo aurum argentumque factum infectumque et signatum.
[5]
infecti argenti fuit quadraginta tria milia pondo et ducenta septuaginta, facti vasa multa omnis generis, caelata pleraque, quaedam eximiae artis; et ex aere multa fabrefacta;
[6]
ad hoc clipea argentea decem. signati argenti octoginta quattuor milia fuere Atticorum; tetrachma vocant; trium fere denariorum in singulis argenti est pondus.
[7]
auri pondo fuit tria milia septingenta quattuordecim et clipeum unum ex auro totum et Philippei nummi aurei quattuordecim milia quingenti quattuordecim.
[8]
tertio die coronae aureae, dona civitatium, tralatae centum quattuordecim;
[9]
et hostiae ductae et ante currum multi nobiles captivi obsidesque, inter quos Demetrius, regis Philippi filius, fuit et Armenes, Nabidis tyranni filius, Lacedaemonius.
[10]
[p. 168] ipse deinde Quinctius in urbem est invectus. secuti currum 2 milites frequentes ut exercitu omni ex provincia deportato.
[11]
his duceni quinquageni aeris in pedites divisi, duplex centurioni, triplex equiti.
[12]
praebuerunt speciem triumpho capitibus rasis secuti, qui servitute exempti fuerant.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.