Titus Livius (Livy), The History of Rome, Book 37
Evan T. Sage, PhD professor of latin and head of the department of classics in the University of Pittsburgh, Ed.

20. per eosdem forte dies Elaeam ex Achaia mille pedites cum centum equitibus, Diophane omnibus iis copiis praeposito, accesserunt, quos egressos navibus obviam missi ab Attalo nocte Pergamum deduxerunt. [2] veterani omnes et periti belli erant, et ipse dux Philopoemenis, summi tum omnium Graecorum imperatoris, discipulus. qui biduum simul ad quietem hominum equorumque et ad visendas hostium stationes, quibus locis temporibusque accederent reciperentque sese, sumpserunt. ad [3] radices fere collis in quo posita urbs est regii succedebant; ita libera ab tergo populatio erat. nullo ab urbe, ne in stationes quidem qui¹ procul iacularetur, [4?] excurrente, postquam semel, compulsi metu, se moenibus incluserunt, contemptus eorum [p. 348] et inde neglegentia apud regios oritur. non stratos,² non infrenatos magna pars habebant equos; [5] paucis ad arma et ordines relictis dilapsi ceteri sparserant se toto passim campo, pars³ in iuvenales lusus lasciviamque versi, pars vescentes sub umbra, quidam somno etiam strati. [6] haec Diophanes ex alta urbe Pergamo contemplatus arma suos capere et ad portam praesto esse iubet; ipse Attalum adit et in animo sibi esse dixit hostium stationem temptare. [7] aegre id permittente Attalo, quippe qui centum equitibus adversus sescentos, mille peditibus cum quattuor milibus pugnaturum cerneret, porta egressus haud procul statione hostium, occasionem opperiens, consedit. [8] et qui Pergami erant amentiam magis quam audaciam credere esse, et hostes paulisper⁴ in eos versi, ut nihil moveri viderunt, nec ipsi quicquam ex solita neglegentia, insuper etiam eludentes paucitatem, mutarunt. [9] Diophanes quietos⁵ aliquamdiu suos, velut ad spectaculum modo eductos, continuit; [10] postquam dilapsos ab ordinibus hostes vidit, peditibus quantum accelerare possent sequi iussis, ipse princeps inter equites cum turma sua, quam potuit effusissimis habenis, clamore ab omni simul pedite atque equite sublato stationem hostium improviso invadit. [11] non homines solum sed equi etiam territi, cum vincula abrupissent, trepidationem et tumultum inter suos fecerunt. [12] pauci stabant [p. 350] impavidi equi; eos ipsos non sternere, non infrenare⁶ aut escendere facile poterant multo maiorem quam pro numero equitum terrorem Achaeis inferentibus. pedites [13] vero⁷ ordinati et praeparati sparsos per neglegentiam et semisomnos prope adorti sunt. caedes passim fugaque per campos facta est. [14] Diophanes secutus effusos, quoad tutum fuit, magno decore genti Achaeorum parto—spectaverant enim e moenibus Pergami non viri modo sed feminae etiam—in praesidium urbis redit.