Click on a word to bring up parses, dictionary entries, and frequency statistics
‘διὰ τί τῶν γαμουμένων αἰχμῇ δορατίου τὴν κόμην διακρίνουσιν;’
ἆρα σύμβολόν ἐστι τοῦτο τοῦ βίᾳ καὶ μετὰ
πολέμου γαμηθῆναι τὰς πρώτας, ἢ μανθάνουσιν
ἀνδράσι, συνοικοῦσαι μαχίμοις καὶ πολεμικοῖς
ἄθρυπτον καὶ ἄθηλυν καὶ ἀφελῆ προσίεσθαι καλλωπισμόν; ὥσπερ ὁ Λυκοῦργος ἀπὸ πρίονος καὶ
[p. 134] πελέκεως κελεύσας τὰ θυρώματα ταῖς οἰκίαις ποιεῖν καὶ τὰς ὀροφάς,
ἄλλῳ δὲ μὴ χρῆσθαι τὸ
παράπαν ἐργαλείῳ, πᾶσαν ἐξέβαλε περιεργίαν καὶ
πολυτέλειαν.
ἢ τὴν διάστασιν αἰνίττεται τὸ γιγνόμενον, ὡς μόνῳ σιδήρῳ τοῦ γάμου διακριθησομένου;
ἢ τὰ μὲν πλεῖστα τῶν γαμικῶν εἰς τὴν Ἥραν ἀνῆπτο; Ἥρας δ᾽ ἱερὸν τὸ δόρυ νενόμισται, καὶ τῶν ἀγαλμάτων αὐτῆς δόρατι στηρίζεται τὰ πλεῖστα καὶ Κυρῖτις ἡ θεὸς ἐπωνόμασται, τὸ γὰρ
δόρυ ‘κύριν’
ἐκάλουν οἱ παλαιοί: διὸ καί φασι Κυρῖνον ὀνομασθῆναι τὸν Ἐνυάλιον.