Click on a word to bring up parses, dictionary entries, and frequency statistics
12. pax domi forisque fuit et hoc et insequente1 anno C. Furio Paculo2 et M. Papirio Crasso consulibus.
[2]
ludi ab decemviris per secessionem plebis a patribus ex senatus consulto voti eo anno facti sunt.
[3]
causa seditionum nequiquam a Poetelio3 quaesita, qui tribunus plebis iterum ea ipsa denuntiando factus
[4?]
neque ut de agris dividendis plebi referrent consules
ad senatum pervincere potuit, et cum magno certamine obtinuisset ut consulerentur patres, consulum
an tribunorum placeret comitia haberi, consules
creari iussi sunt;
[5]
ludibrioque erant minae tribuni
denuntiantis se dilectum impediturum, cum quietis
finitimis neque bello neque belli apparatu opus
esset.
[6]
sequitur hanc tranquillitatem rerum annus Proculo
Geganio Macerino L. Menenio Lanato consulibus
multiplici clade ac periculo insignis, seditionibus,
fame, regno prope per largitionis dulcedinem in
cervices accepto;
[7]
unum afuit bellum externum; quo
si adgravatae res essent, vix ope deorum omnium
[p. 298]
resisti potuisset. coepere a fame mala, seu adversus4 annus frugibus fuit, seu dulcedine contionum et
urbis deserto agrorum cultu; nam utrumque traditur.
et patres plebem desidem et tribuni plebis nunc
fraudem nunc neglegentiam consulum accusabant.
[8]
postremo perpulere plebem haud adversante senatu
ut L. Minucius praefectus annonae crearetur, felicior
in eo magistratu ad custodiam libertatis futurus quam
ad curationem ministerii sui, quamquam postremo
annonae quoque levatae haud immeritam et gratiam
et gloriam tulit.
[9]
qui cum multis circa finitimos
populos legationibus terra marique nequiquam missis,
nisi quod ex Etruria haud ita multum frumenti
advectum est, nullum momentum annonae fecisset,
et revolutus ad dispensationem inopiae,
[10?]
profiteri
cogendo frumentum et vendere quod usui menstruo
superesset, fraudandoque parte diurni cibi servitia,
criminando inde et obiciendo irae populi frumentarios, acerba inquisitione aperiret magis quam
levaret inopiam,
[11?]
multi ex plebe, spe amissa, potius
quam ut cruciarentur trahendo animam, capitibus
obvolutis se in Tiberim praecipitaverunt.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.