Titus Livius (Livy), The History of Rome, Book 39
Evan T. Sage, Ph.D., Ed.

51. ad Prusiam regem legatus T. Quinctius Flamininus venit, quem suspectum Romanis et receptus post fugam Antiochi Hannibal et bellum adversus Eumenem motum faciebat. [2] ibi seu quia a Flaminino inter cetera obiectum Prusiae erat [p. 380] hominem omnium, qui viverent, infestissimum populo¹ Romano apud eum esse, qui patriae suae primum, deinde fractis eius opibus Antiocho regi auctor belli adversus populum Romanum fuisset; [3] seu quia ipse Prusias, ut² gratificaretur praesenti Flaminino Romanisque, per se necandi aut tradendi eius in potestatem consilium cepit; a primo colloquio Flaminini milites extemplo ad domum Hannibalis custodiendam missi sunt. [4] semper talem exitum vitae suae Hannibal prospexerat animo et Romanorum inexpiabile³ odium in se cernens, et fidei regum nihil sane confisus:⁴ Prusiae vero levitatem etiam expertus erat; Flaminini quoque adventum sibi velut fatalem horruerat. [5] ad omnia undique infesta ut iter semper aliquod praeparatum fugae haberet, septem exitus e domo fecerat, et ex iis quosdam occultos, ne custodia saepirentur. [6] sed grave imperium regum nihil inexploratum, quod vestigari volunt, efficit. totius circuitum domus ita custodiis complexi sunt, ut nemo inde elabi posset. [7] Hannibal, postquam est nuntiatum⁵ milites regios in vestibulo esse, postico, quod devium maxime atque occultissimi exitus erat, fugere conatus, [8?] ut id quoque occursu militum obsaeptum sensit et omnia circa clausa custodiis dispositis esse venenum, quod multo ante praeparatum ad tales habebat casus, poposcit. [9] “liberemus” inquit⁶ “diuturna cura populum Romanum, quando [p. 382] mortem senis exspectare longum censent. [10] nec⁷ magnam nec memorabilem ex inermi proditoque Flamininus victoriam feret. mores quidem populi Romani quantum mutaverint, vel hic dies argumento erit. [11] horum patres Pyrrho regi, hosti armato, exercitum in Italia habenti ut a veneno caveret praedixerunt: hi legatum consularem, qui auctor esset Prusiae per scelus occidendi hospitis, miserunt.” [12] exsecratus deinde in caput regnumque Prusiae et hospitales deos violatae ab eo fidei testes invocans, poculum exhausit. hic vitae exitus fuit Hannibalis.