Click on a word to bring up parses, dictionary entries, and frequency statistics
[32]
ab his, qui pecudum ritu ad voluptatem omnia
referunt, longe dissentiunt; nec mirum; nihil enim
altum, nihil magnificum ac divinum suspicere possunt,
qui suas omnis cogitationes abiecerunt in rem tam
humilem tamque contemptam. quam ob rem hos
quidem ab hoc sermone removeamus, ipsi autem
intellegamus natura gigni sensum diligendi et benevolentiae caritatem facta significatione probitatis,
quam qui appetiverunt, applicant sese et propius
admovent, ut et usu eius, quem diligere coeperunt,
fruantur et moribus, sintque pares in amore et
aequales propensioresque ad bene merendum quam
ad reposcendum, atque haec inter eos sit honesta
[p. 144]
certatio. Sic et utilitates ex amicitia maximae
capientur, et erit eius ortus a natura quam ab imbecillitate gravior et verior. nam si utilitas conglutinaret amicitias, eadem commutata dissolveret; sed
quia natura mutari non potest, idcirco verae amicitiae
sempiternae sunt.
ortum quidem amicitiae videtis, nisi quid ad haec
forte vultis.
FANNIUS. Tu vero perge, Laeli! pro hoc enim,
qui minor est natu, meo iure respondeo.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.