This text is part of:
Search the Perseus Catalog for:
Click on a word to bring up parses, dictionary entries, and frequency statistics
pr. perfecto, Marcelle Victori, operis tibi dedicati
tertio libro et iam quarta fere laboris parte transacta,
nova insuper mihi diligentiae causa et altior sollicitudo, quale iudicium hominum emererer, accessit.
adhuc enim velut studia inter nos conferebamus, et
si parum nostra institutio probaretur a ceteris,
contenti fore domestico usu videbamur, ut tui meique
filii formare disciplinam satis putaremus.
[2]
cum vero
mihi Domitianus Augustus sororis suae nepotum
delegaverit curam, non satis honorem iudiciorum
caelestium intelligam, nisi ex hoc oneris quoque
magnitudinem metiar.
[3]
quis enim mihi aut mores
excolendi sit modus, ut eos non immerito probaverit
sanctissimus censor? aut studia, ne fefellisse in iis
[p. 4]
videar principem ut in omnibus, ita in eloquentia
quoque eminentissimum?
[4]
quodsi nemo miratur
poetas maximos saepe fecisse, ut non solum initiis
operum suorum Musas invocarent, sed provecti
quoque longius, cum ad aliquem graviorem venissent
locum, repeterent vota et velut nova precatione
uterentur,
[5]
mihi quoque profecto poterit ignosci, si,
quod initio, quo primum hanc materiam inchoavi,
non feceram, nunc omnes in auxilium deos ipsumque
in primis, quo neque praesentius aliud nec studiis
magis propitium numen est, invocem, ut, quantum
nobis exspectationis adiecit, tantum ingenii adspiret
dexterque ac volens adsit et me qualem esse credidit
faciat.
[6]
cuius mihi religionis non haec sola ratio,
quae maxima est, sed alioqui sic procedit ipsum
opus, ut maiora praeteritis ac magis ardua sint,
quae ingredior. sequitur enim, ut iudicialium
causarum, quae sunt maxime variae ac multiplices,
ordo explicetur: quod prooemii sit officium, quae
ratio narrandi, quae probationum fides, seu proposita confirmamus sive contra dicta dissolvimus,
quanta vis in perorando, seu reficienda brevi repetitione rerum memoria est iudicis sive adfectus
(quod est longe potentissimum) commovendi.
[7]
de
quibus partibus singulis quidam separatim scribere
maluerunt velut onus totius corporis veriti, et sic
[p. 6]
quoque complures de unaquaque earum libros
ediderunt; quas ego omnes ausus contexere prope
infinitum laborem prospicio et ipsa cogitatione
suscepti muneris fatigor. Sed durandum est, quia
coepimus, et si viribus deficiemur, animo tamen
perseverandum.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.