This text is part of:
Click on a word to bring up parses, dictionary entries, and frequency statistics
19.
Aggerabatur nihilo minus caespes iamque pectori
usque adcreverat, cum tandem pervicacia victi inceptum
omisere. Blaesus multa dicendi arte non per seditionem et
turbas desideria militum ad Caesarem ferenda ait, neque
veteres ab imperatoribus priscis neque ipsos a divo Augusto
tam nova petivisse; et parum in tempore incipientis principis curas onerari. si tamen tenderent in pace temptare
quae ne civilium quidem bellorum victores expostulaverint,
cur contra morem obsequii, contra fas disciplinae vim meditentur? decernerent legatos seque coram mandata darent.
adclamavere ut filius Blaesi tribunus legatione ea fungeretur
peteretque militibus missionem ab sedecim annis: cetera
mandaturos ubi prima provenissent. profecto iuvene modicum otium: sed superbire miles quod filius legati orator
publicae causae satis ostenderet necessitate expressa quae
per modestiam non obtinuissent.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.