Titus Livius (Livy), The History of Rome, Book 29
Frank Gardener Moore, Professor Emeritus in Columbia University, Ed.

[4] praetor legatique Locros profecti primam, sicuti mandatum erat, religionis curam habuere: omnem enim sacram pecuniam quaeque apud Pleminium quaeque apud² milites erat conquisitam, cum ea quam³ ipsi secum attulerant, in thensauris reposuerunt ac piaculare sacrum fecerunt. [5] tum vocatos ad contionem milites praetor signa extra urbem efferre iubet castraque in campo locat cum gravi edicto, si quis miles aut in urbe restitisset aut secum extulisset [p. 290] quod suum non esset;⁴ Locrensibus se permittere⁵ ut quod sui⁶ quisque cognosset prenderet, si quid non compareret, repeteret.⁷ [6] ante omnia libera corpora placere sine mora Locrensibus restitui; non levi defuncturum poena qui non restituisset.

[7] Locrensium deinde contionem habuit atque iis libertatem legesque suas populum Romanum senatumque restituere dixit; si qui Pleminium aliumve quem accusare vellet, Regium se sequeretur; [8] si de P. Scipione publice queri vellent ea quae Locris nefarie in deos hominesque facta essent iussu aut voluntate P. Scipionis facta esse, legatos mitterent Messanam; [9] ibi se cum consilio cogniturum. Locrenses praetori legatisque, senatui⁸ ac populo Romano gratias egerunt; se ad Pleminium accusandum ituros; [10] Scipionem, quamquam parum iniuriis civitatis suae doluerit, eum esse virum quem amicum sibi quam inimicum malint esse; pro certo se habere neque iussu neque voluntate P. Scipionis tot tam nefanda commissa, sed aut Pleminio nimium, sibi⁹ parum creditum, [11] aut natura insitum quibusdam esse ut magis peccari nolint quam satis animi ad vindicanda peccata habeant.

et praetori et consilio haud mediocre onus [p. 292] demptum erat de Scipione cognoscendi. [12] Pleminium et ad¹⁰ duo et triginta homines cum eo damnaverunt atque in catenis Romam miserunt. [13] ipsi ad Scipionem profecti sunt, ut ea quoque quae volgata sermonibus erant de cultu ac desidia imperatoris solutaque disciplina militiae comperta oculis referrent¹¹ Romam.