Titus Livius (Livy), The History of Rome, Book 33
Evan T. Sage, Ph.D. Professor of Latin and Head of the Department of Classics in the University of Pittsburgh, Ed.

12. indutiae quindecim dierum datae hosti erant et cum ipso rege constitutum colloquium; cuius priusquam tempus veniret, in consilium advocavit socios; rettulit quas leges pacis placeret [p. 306] dici. [2] Amynander, Athamanum rex, paucis sententiam¹ absolvit; ita componendam pacem esse ut Graecia etiam absentibus Romanis satis potens tuendae simul pacis libertatisque esset. [3] Aetolorum asperior oratio fuit, qui pauca praefati recte atque ordine imperatorem Romanum facere quod, quos belli socios habuisset, cum iis communicaret pacis consilia; [4] falli autem eum tota re si aut Romanis pacem aut Graeciae libertatem satis firmam se credat relicturum nisi Philippo aut occiso aut regno pulso; quae utraque proclivia esse si fortuna uti vellet. [5] ad haec Quinctius negare Aetolos aut moris Romanorum memores aut sibi ipsis convenientem sententiam dixisse. [6] et illos prioribus omnibus conciliis colloquiisque de condicionibus pacis semper, non ut² ad internecionem bellaretur, [7?] disseruisse, et Romanos, praeter vetustissimum morem victis parcendi praecipuum clementiae documentum dedisse pace Hannibali et Carthaginiensibus data. [8] omittere se Carthaginienses; cum Philippo ipso quotiens ventum in colloquium? nec umquam ut cederet regno actum esse. an quia victus proelio foret inexpiabile bellum factum? [9] cum armato hoste infestis animis concurri debere; adversus victos mitissimum quemque animum maximum habere. libertati Graeciae videri graves Macedonum reges; [10] [p. 308] si regnum gensque tollatur, Thracas, Illyrios, Gallos³ deinde, gentes feras et indomitas, in Macedoniam se et in Graeciam effusuras. [11] ne proxima quaeque amoliendo maioribus gravioribusque aditum ad se facerent. [12] interfanti deinde Phaeneae, praetori Aetolorum, testificantique si elapsus eo tempore Philippus foret mox gravius eum rebellaturum, “desistite tumultuari” inquit “ubi consultandum est. [13] non iis condicionibus illigabitur rex⁴ ut movere bellum possit.”