Click on a word to bring up parses, dictionary entries, and frequency statistics
28.
Galli
occursant in ripa cum variis ululatibus cantuque moris
sui quatientes scuta super capita vibrantesque dextris
[p. 25]
tela,
[2]
quamquam et ex adverso terrebat tanta vis navium cum ingenti sono fluminis et clamore vario nautarum militumque, et qui nitebantur perrumpere impetum fluminis et qui ex altera ripa traicientes suos
hortabantur;
[3]
et iam satis paventes adverso tumultu
terribilior ab tergo adortus clamor castris ab Hannone
captis. mox et ipse aderat, ancepsque terror circumstabat et e navibus tanta vi armatorum in terram
evadente et ab tergo inprovisa premente acie.
[4]
Galli
postquam utroque vim facere conati pellebantur, qua
patere visum maxime iter, perrumpunt trepidique in
vicos passim suos diffugiunt. Hannibal ceteris copiis
per otium traiectis spernens iam Gallicos tumultus
castra locat.
[5]
elephantorum traiciendorum varia consilia fuisse
credo, certe variat memoria actae rei. quidam congregatis ad ripam elephantis tradunt ferocissimum ex
iis inritatum ab rectore suo, cum refugientem in aquam
nantem sequeretur, traxisse gregem, ut quemque timentem altitudinem destitueret vadum, impetu ipso
fluminis in alteram ripam rapiente.
[6]
ceterum magis
constat ratibus traiectos; id ut tutius consilium ante
rem foret, ita acta re ad fidem pronius est.
[7]
ratem
unam ducentos longam pedes quinquaginta latam a
terra in amnem porrexerunt, quam, ne secunda aqua
deferretur, pluribus validis retinaculis parte superiore
ripae religatam pontis in modum humo iniecta constraverunt, ut beluae audacter velut per solum ingrederentur;
[8]
altera ratis aeque lata, longa pedes centum,
ad traiciendum flumen apta, huic copulata est; tum
elephanti per stabilem ratem tamquam viam praegredientibus feminis acti ubi in minorem adplicatam transgressi sunt,
[9]
extemplo resolutis, quibus leviter adnexa
erat, vinculis ab actuariis aliquot navibus ad alteram
ripam pertrahitur.
[10]
ita primis expositis alii deinde repetiti ac traiecti sunt. nihil sane trepidabant, donec
continenti velut ponte agerentur; primus erat pavor,
[p. 26]
cum soluta ab ceteris rate in altum raperentur;
[11]
ibi
urgentes inter se cedentibus extremis ab aqua trepidationis aliquantum edebant, donec quietem ipse timor
circumspectantibus aquam fecisset.
[12]
excidere etiam saevientes quidam in flumen; sed pondere ipso stabiles
deiectis rectoribus quaerendis pedetemptim vadis in
terram evasere.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.