Click on a word to bring up parses, dictionary entries, and frequency statistics
40.
Sexto demum die apud imas Esquilias finis incendio
factus, prorutis per immensum aedificiis ut continuae violentiae campus et velut vacuum caelum occurreret. necdum
positus metus aut redierat plebi spes: rursum grassatus
ignis patulis magis urbis locis; eoque strages hominum
minor, delubra deum et porticus amoenitati dicatae latius
procidere. plusque infamiae id incendium habuit quia
praediis Tigellini Aemilianis proruperat videbaturque Nero
condendae urbis novae et cognomento suo appellandae
gloriam quaerere. quippe in regiones quattuordecim Roma
dividitur, quarum quattuor integrae manebant, tres solo
tenus deiectae: septem reliquis pauca tectorum vestigia
supererant, lacera et semusta.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.