Click on a word to bring up parses, dictionary entries, and frequency statistics
74.
Tum decreta dona et grates deis decernuntur,
propriusque honos Soli, cui est vetus aedes apud circum
in quo facinus parabatur, qui occulta coniurationis numine
retexisset; utque circensium Cerealium ludicrum pluribus
equorum cursibus celebraretur mensisque Aprilis Neronis
cognomentum acciperet; templum Saluti extrueretur eo loci
* ... ex quo Scaevinus ferrum prompserat. ipse eum pugionem apud Capitolium sacravit inscripsitque Iovi Vindici: in
praesens haud animadversum; post arma Iulii Vindicis ad
auspicium et praesagium futurae ultionis trahebatur. reperio
in commentariis senatus Cerialem Anicium consulem
designatum pro sententia dixisse ut templum divo Neroni
quam maturrime publica pecunia poneretur. quod quidem
ille decernebat tamquam mortale fastigium egresso et
venerationem hominum merito, sed ipse prohibuit, ne
interpretatione quorundam ad omen malum sui exitus
verteretur: nam deum honor principi non ante habetur
quam agere inter homines desierit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.