Click on a word to bring up parses, dictionary entries, and frequency statistics
73.
Funus sine imaginibus et pompa per laudes ac
memoriam virtutum eius celebre fuit. et erant qui formam,
aetatem, genus mortis ob propinquitatem etiam locorum in
quibus interiit, magni Alexandri fatis adaequarent. nam
utrumque corpore decoro, genere insigni, haud multum
triginta annos egressum, suorum insidiis externas inter
gentis occidisse: sed hunc mitem erga amicos, modicum
voluptatum, uno matrimonio, certis liberis egisse, neque
minus proeliatorem, etiam si temeritas afuerit praepeditusque
sit perculsas tot victoriis Germanias servitio premere. quod
si solus arbiter rerum, si iure et nomine regio fuisset, tanto
promptius adsecuturum gloriam militiae quantum clementia,
temperantia, ceteris bonis artibus praestitisset. corpus antequam cremaretur nudatum in foro Antiochensium, qui locus
sepulturae destinabatur, praetuleritne veneficii signa parum
constitit; nam ut quis misericordia in Germanicum et praesumpta suspicione aut favore in Pisonem pronior, diversi
interpretabantur.
Annales ab excessu divi Augusti. Cornelius Tacitus. Charles Dennis Fisher. Clarendon Press. Oxford. 1906.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.