Titus Livius (Livy), The History of Rome, Book 40
Evan T. Sage, Ph.D. and Alfred C. Schlesinger, Ph.D., Ed.

42. eodem anno L. Duronius, qui praetor anno superiore fuerat,¹ ex Illyrico cum decem navibus Brundisium rediit. inde in portu relictis navibus cum venisset Romam, inter exponendas res quas ibi gessisset, haud dubie in regem Illyriorum Gentium latrocinii omnis maritimi causam avertit: [2] ex regno eius omnes naves esse, quae superi maris oram depopulatae essent; de his rebus se² legatos misisse, [3] nec conveniendi regis potestatem factam. venerant Romam legati a Gentio, qui, quo tempore Romani conveniendi regis causa venissent, aegrum forte eum [p. 132] in ultimis partibus fuisse regni dicerent: [4] petere³ Gentium ab senatu ne crederent confictis criminibus in se quae inimici detulissent. ad ea Duronius adiecit multis civibus Romanis⁴ et sociis Latini nominis iniurias factas in regno eius, et cives Romanos dici Corcyrae retineri. [5] eos omnes Romam adduci placuit,⁵ C. Claudium praetorem cognoscere, neque ante Gentio regi legatisve eius responsum reddi.

[6] inter multos alios quos pestilentia eius anni absumpsit, sacerdotes quoque aliquot mortui sunt. L. Valerius Flaccus pontifex mortuus est: in eius locum suffectus est Q. Fabius Labeo. [7] P.⁶ Manlius, qui nuper ex ulteriore Hispania redierat, triumvir epulo: Q. Fulvius M. F. in locum eius triumvir cooptatus, tum praetextatus erat. [8] de rege sacrificulo⁷ sufficiendo in locum Cn. Cornelii Dolabellae contentio inter C. Servilium pontificem maximum fuit et L. Cornelium Dolabellam duumvirum navalem, quem ut inauguraret pontifex magistratu sese abdicare iubebat. [9] recusantique id facere ob eam rem multa duumviro dicta a pontifice, deque ea cum [p. 134] provocasset certatum ad populum. [10] cum plures iam⁸ tribus intro vocatae dicto esse audientem pontifici duumvirum iuberent, multamque remitti, si magistratu se abdicasset, vitium⁹ de caelo quod comitia turbaret, intervenit. religio inde fuit pontificibus inaugurandi Dolabellae. [11] P. Cloelium Siculum inaugurarunt, qui secundo loco nominatus¹⁰ erat. exitu anni et C. Servilius Geminus pontifex maximus decessit: idem decemvir sacrorum fuit. pontifex in locum eius a collegio cooptatus est Q. Fulvius Flaccus: [12] creatus¹¹ inde¹² pontifex maximus M.¹³ Aemilius Lepidus, cum multi clari viri petissent; et decemvir sacrorum Q. Marcius Philippus in eiusdem locum est cooptatus. [13] et augur Sp. Postumius Albinus decessit: in locum eius P. Scipionem, filium Africani, augures cooptarunt.

cumanis eo anno petentibus permissum ut publice Latine loquerentur et praeconibus Latine vendendi ius esset.