86. ad Lelium et alios sodales
Quid ruri facitis, mei sodales?Quae vos causa tenet diu morantes?
Iam saevus Canis ardor aestuosae
Cessavit, neque frigus est opacum
5Captandum amplius arborum sub umbra:
Et iam frigida nox diesque coelo
Breves praecipitant. Redite in urbem
Et vino simul et iocis vacate.
Nam tempus monet ocio beato
10Frui, dum licet, et iuventa cursu
Veloci fugiens ait: "Valete,
Insani iuvenes, procul recedo;
A tergo insequitur gravis senectus,
Et mortis comes et comes malorum".