1. audita vobis esse arbitror, Quirites, quae sint acta in
senatu, quae fuerit cuiusque sententia. res enim ex Kalendis
Ianuariis agitata paulo ante confecta est, minus
quidem illa1 severe quam decuit, non tamen omnino dissolute.
mora est adlata bello, non causa sublata. quam
ob rem, quod quaesivit ex me P. Apuleius, homo et multis
officiis mihi et summa familiaritate coniunctus et vobis
amicissimus, ita respondebo ut ea quibus non interfuistis
nosse possitis. causa fortissimis optimisque consulibus
Kalendis Ianuariis de re publica primum referendi fuit ex
eo quod a. d.2 xiii. Kalendas Ianuarias senatus me auctore decrevit.
[2]
eo die primum, Quirites, fundamenta sunt iacta3
rei publicae: fuit enim longo intervallo ita liber senatus ut
vos aliquando liberi essetis. quo quidem tempore, etiam
si ille dies vitae finem mihi adlaturus esset, satis magnum
ceperam fructum, cum vos universi una mente atque voce
iterum a me conservatam esse rem publicam conclamastis.
hoc vestro iudicio tanto tamque praeclaro excitatus ita
Kalendis Ianuariis veni in senatum ut meminissem quam
personam impositam a vobis sustinerem. itaque bellum
nefarium inlatum rei publicae cum viderem, nullam moram
interponendam insequendi M. Antonium4 putavi, hominemque
audacissimum qui multis nefariis rebus ante commissis
hoc tempore imperatorem populi Romani oppugnaret, coloniam
vestram fidissimam fortissimamque obsideret, bello
censui persequendum: tumultum esse decrevi5; iustitium
edici, saga sumi dixi placere, quo omnes acrius graviusque
incumberent ad ulciscendas rei publicae iniurias, si omnia
gravissimi belli insignia suscepta a senatu viderent.
[3]
itaque
haec sententia, Quirites6, sic per triduum valuit ut, quamquam
discessio facta non esset7, tamen praeter paucos omnes8
mihi adsensuri viderentur. hodierno autem die spe nescio
qua eis obiecta9 remissior senatus fuit. nam plures eam
sententiam secuti sunt ut, quantum senatus auctoritas vesterque10
consensus apud Antonium valiturus esset, per legatos
experiremur.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 illa quidem coni. Müller
2 a. d. suppl. Orelli
3 sunt iacta Garatoni: sunt iacta sunt V: iacta sunt Poggius
4 M. Antoni coni. Müller
5 decerni ed. R
6 Quirites Faernus: quam V
7 non esset fort. non est (variam lectionem non est add. V1 post dies)
8 homines omnes V
9 die, spe nescio qua eis obiecta Jeep (pacis pro eis Bücheler): dies non est pene. scio quaeis obiectarem V: die nescio qua obiecta re Poggius
10 vestraeque V: corr. Poggius
M. Tullius Cicero. M. Tulli Ciceronis Orationes: Recognovit breviqve adnotatione critica instrvxit Albertus Curtis Clark Collegii Reginae Socius. Albert Curtis Clark. Oxford. e Typographeo Clarendoniano. 1918. Scriptorum Classicorum Bibliotheca Oxoniensis.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.