19.
[52]
quae cum ita sint, de Caesare satis hoc tempore dictum
habebo. nec vero de L. Egnatuleio, fortissimo et constantissimo
civi amicissimoque rei publicae, silendum arbitror;
sed tribuendum testimonium virtutis egregiae, quod is
legionem quartam ad Caesarem adduxerit, quae praesidio
consulibus, senatui populoque Romano reique publicae
esset: ob eam causam placere uti L. Egnatuleio triennio1
ante legitimum tempus magistratus2 petere, capere, gerere
liceat. in quo, patres conscripti, non tantum commodum
tribuitur L. Egnatuleio quantus honos: in tali enim re satis
est nominari.
[53]
de exercitu autem C. Caesaris ita censeo decernendum:
'senatui placere, militibus veteranis qui Caesaris pontificis
pro praetore3 auctoritatem secuti libertatem populi Romani4
auctoritatemque huius ordinis defenderint atque defendant
ipsis5 liberisque eorum militiae vacationem esse, utique
C. Pansa A. Hirtius consules, alter ambove6, si eis videretur,
cognoscerent qui ager eis coloniis esset quo milites veterani
deducti essent, qui contra legem Iuliam possideretur, ut is
militibus veteranis divideretur; de agro Campano separatim
cognoscerent inirentque rationem de commodis militum
veteranorum augendis, legionique Martiae et legioni
quartae et eis militibus qui de legione secunda, tricesima
quinta ad C. Pansam A. Hirtium consules venissent suaque
nomina edidissent, quod eis auctoritas senatus populique
Romani libertas carissima sit et fuerit, vacationem militiae
ipsis liberisque eorum esse placere extra tumultum Gallicum
Italicumque: easque legiones bello confecto missas fieri
placere; quantamque pecuniam militibus earum legionum
in singulos C. Caesar, pontifex, pro praetore7 pollicitus sit,
tantam dari placere; utique C. Pansa A. Hirtius consules,
alter ambove, si eis videretur, rationem agri haberent qui
sine iniuria privatorum dividi posset8, eisque militibus,
legioni Martiae et legioni quartae ita darent, adsignarent
ut quibus militibus amplissime dati, adsignati essent.' dixi
ad ea omnia, consules, de quibus rettulistis: quae si erunt
sine mora matureque decreta, facilius apparabitis ea quae
tempus et necessitas flagitat. celeritate autem opus est:
qua si essemus usi, bellum, ut saepe dixi, nullum haberemus.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 triennium V: corr. Lambinus
2 magistratus Poggius: magna V: magistratum Halm
3 pro praetore suppl. Lambinus
4 auctoritatem ... Romani suppl. Garatom ex iii. 37
5 ipsis coni. Müller: iis V
6 alter ambove (ita Poggius) si eis videretur Vrsinus Poggium secutus: aa. uesieu V1: aa. designati V2
7 pro praetore δ: populo Romano V: del. Poggius
8 haberent ... posset Schütz: habent ... possit V: habeant ... possit Poggius
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.