This text is part of:
Search the Perseus Catalog for:
Click on a word to bring up parses, dictionary entries, and frequency statistics
[53]
Et plane interpellavit saltationis libidinem
actuarius, qui tanquam urbis acta recitavit: “VII. kalendas sextiles: in
praedio Cumano, quod est Trimalchionis, nati sunt pueri xxx, puellae XL; sublata
in horreum ex area tritici millia modium quingenta; boves domiti quingenti.
Eodem die: Mithridates servus in crucem actus est, quia Gai nostri genio male
dixerat. Eodem die: in arcam relatum est, quod collocari non potuit, sestertium
centies. Eodem die: incendium factum est in hortis Pompeianis, ortum ex aedibus
Nastae vilici.”
“Quid?” inquit Trimalchio “quando mihi Pompeiani horti emptisunt?”
“Anno priore” inquit actuarius “et ideo in rationem nondum
venerunt.” Excanduit Trimalchio et “Quicunque” inquit
“mihi fundi empti fuerint, nisi intra sextum mensem sciero,[p. 94]
in rationes meas inferri vetuo.” Iam etiam edicta aedilium recitabantur
et saltuariorum testamenta, quibus Trimalchio cum elogio exheredabatur; iam nomina
vilicorum et repudiata a cilcitore Iiberta in balneatoris contubernio deprehensa et
atriensis Baias relegatus; iam reus factus dispensator et iudicium inter
cubicularios actum.
Petauristarii autem tandem venerunt. Baro insulsissimus cum scalis constitit
puerumque iussit per gradus et in summa parte odaria saltare, circulos deinde
ardentes transilire1 et dentibus amphoram sustinere. Mirabatur haec solus Trimalchio
dicebatque ingratum artificium esse. Ceterum duo esse in rebus humanis, quae
libentissime spectaret, petauristarios et cornicines;2 reliqua
animalia3
acroamata tricas meras esse. “Nam et comoedos” inquit “emeram,
sed malui illos Atellaniam4 facere, et choraulen meum iussi Latine cantare.”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.