This text is part of:
Search the Perseus Catalog for:
Click on a word to bring up parses, dictionary entries, and frequency statistics
“
[76]
Ceterum, quemadmodum di volunt, dominus in
domo factus sum, et ecce cepi ipsimi cerebellum. Quid multa? coheredem me
Caesari fecit, et accepi patrimonium laticlavium. Nemini tamen nihil satis est.
Concupivi negotiari. Ne multis vos morer, quinque naves aedificavi, oneravi
vinum—et tune erat contra aurum—misi Romam. Putares me hoc
iussisse: omnes naves naufragarunt, factum, non fabula. Uno die Neptunus
trecenties sestertium devoravit. Putatis me defecisse? Non mehercules mi haec
iactura gusti fuit, tanquam nihil facti. Alteras feci maiores et meliores et
feliciores, ut nemo non me virum fortem diceret. Scitis, magna navis magnam
fortitudinem habet. Oneravi rursus vinum, lardum, fabam, seplasium, mancipia.
Hoc loco Fortunata rem piam fecit; omne enim aurum suum, omnia vestimenta
vendidit et mi centum aureos in manu posuit. Hoc fuit peculii mei fermentum.
Cito fit, quod di volunt.[p. 152] Uno cursu centies sestertium
corrotundavi. Statim redemi fundos omnes, qui patroni mei fuerant. Aedifico
domum, venalicia coemo iumenta; quicquid tangebam, crescebat tanquam favus.
Postquam coepi plus habere, quam tota patria mea habet, manum de tabula: sustuli
me de negotiatione et coepi libertos faenerare. Et sane nolentem me negotium
meum agere exhortavit mathematicus, qui venerat forte in coloniam nostram,
Graeculio, Serapa nomine, consiliator deorum. Hic mihi dixit etiam ea, quae
oblitus eram; ab acia et acu mi omnia exposuit; intestinas meas noverat; tantum
quod mihi non dixerat, quid pridie cenaveram. Putasses illum semper mecum
habitasse.”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.