This text is part of:
Search the Perseus Catalog for:
Click on a word to bring up parses, dictionary entries, and frequency statistics
[78]
Non est moratus Stichus, sed et stragulam albam et
praetextam in triclinium attulit ... iussitque nos temptare, an bonis lanis
essent confecta. Tum subridens “Vide tu” inquit “Stiche, ne ista
mures tangant aut tineae? alioquin te vivum comburam. Ego gloriosus volo
efferri, ut totus mihi populus bene imprecetur.” Statim ampullam nardi
aperuit omnesque nos unxit et “Spero” inquit “futurum ut aeque me
mortuum iuvet tanquam vivum.” Nam vinum quidem in vinarium iussit infundi
et “Putate vos” ait “ad parentalia mea invitatos esse.”
Ibat res ad summam nausea, cum Trimalchio ebrietate turpissima gravis novum acroama,
cornicines, in triclinium iussit adduci, fultusque cervicalibus multis extendit se
super torum extremum et “Fingite me” inquit “mortuum esse. Dicite
aliquid belli.” Consonuere cornicines funebri strepitu. Unus praecipue
servus libitinarii illius, qui inter hos honestissimus erat, tam valde intonuit, ut
totam concitaret viciniam,[p. 156] Itaque vigiles, qui custodiebant vicinam
regionem, rati ardere Trimalchionis domum, effregerunt ianuam subito et cum aqua
securibusque tumultuari suo iure coeperunt. Nos occasionem opportunissimam nacti
Agamemnoni verba dedimus raptimque tam plane quam ex incendio fugimus.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.