Click on a word to bring up parses, dictionary entries, and frequency statistics
[17]
Ut igitur ante meridiem discesserunt paulumque requierunt,
in primis hoc a se Cotta animadversum esse dicebat,
omne illud tempus meridianum Crassum in acerrima
atque attentissima cogitatione posuisse seseque, qui vultum
eius, cum ei dicendum esset, obtutumque oculorum in cogitando
probe nosset atque in maximis causis saepe vidisset,
tum dedita opera quiescentibus aliis in eam exedram venisse,
in qua Crassus posito lectulo recubuisset, cumque eum defixum
in cogitatione esse sensisset, statim recessisse atque in
eo silentio duas horas fere esse consumptas. Deinde cum
omnes inclinato iam in posmeridianum tempus die venissent
ad Crassum, 'quid est, Crasse,' inquit Iulius 'imusne
sessum? Etsi admonitum venimus te, non flagitatum.'
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.