16. sed omittatur bellum illud in quo tu
nimium felix fuisti. ne de iocis1 quidem respondebo
quibus me in castris usum esse dixisti: erant quidem illa2
castra plena curae; verum tamen homines, quamvis in
turbidis rebus sint, tamen, si modo homines sunt, interdum
animis relaxantur.
[40]
quod autem idem maestitiam meam
reprehendit, idem iocum, magno argumento est me in
utroque fuisse moderatum.
hereditates3 mihi negasti venire. Vtinam hoc tuum
verum crimen esset! plures amici mei et necessarii viverent.
sed qui istuc tibi venit in mentem? ego enim
amplius sestertium ducentiens acceptum hereditatibus
rettuli4. quamquam in hoc genere fateor feliciorem esse
te. me nemo nisi amicus fecit heredem, ut cum illo
commodo, si quod erat, animi quidam dolor iungeretur; te
is quem tu vidisti numquam, L. Rubrius Casinas fecit
heredem5.
[41]
et quidem vide quam te amarit is qui albus aterne
fuerit ignoras. fratris filium praeterit6, Q. Fufi, honestissimi
equitis Romani suique amicissimi, quem palam heredem
semper factitarat, ne nominat quidem7: te, quem numquam
viderat aut certe numquam8 salutaverat, fecit heredem.
velim mihi dicas, nisi molestum est, L. Turselius9 qua facie
fuerit, qua statura, quo municipio, qua tribu. 'nihil scio'
inquies10 'nisi quae praedia habuerit.' igitur11 fratrem exheredans
te faciebat heredem. in multas praeterea pecunias
alienissimorum hominum vi eiectis veris heredibus, tamquam
heres esset, invasit.
[42]
quamquam hoc maxime admiratus
sum, mentionem te hereditatum ausum esse facere, cum
ipse hereditatem patris non adisses.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 de iocis Wesenberg: iocis D: totis V
2 quidem illa Vns: illa quidem ct
3 hereditates Naugerius (1): -tate V: -tatem D
4 retuli VD
5 fecit heredem del. Madvig (peiore numero)
6 praeterit Vns: -riit c: -reo t
7 ne nomen quidem perscripsit D
8 aut certe numq. Faernus: ut (aut V2) cere numq. V: ac ne umq. D
9 Tursecius D
10 inques V: inquis Klotz
11 is igitur V2
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.