65.
[182]
post triennium igitur agitata denuo1
quaestio de viri morte habebatur. at2 de quibus servis3?
nova, credo, res obiecta, novi quidam homines in suspicionem
vocati sunt. de Stratone et de Nicostrato. quid?
Romae quaesitum de istis hominibus non erat? itane
tandem, mulier iam non morbo sed scelere furiosa, cum
quaestionem habuisses4 Romae, cum de T. Anni, L. Rutili5,
P. Saturi, ceterorum6 honestissimorum virorum sententia
constitutum esset satis quaesitum videri, eadem de re triennio
post isdem de hominibus nullo adhibito non dicam viro,
ne colonum forte adfuisse dicatis, sed bono viro, in fili
caput quaestionem habere conata es7?
[183]
an hoc dicitis —
mihi enim venit in mentem quid dici possit, tametsi adhuc8
non esse hoc9 dictum mementote — cum haberetur de furto
quaestio, Stratonem aliquid de veneno esse confessum? hoc
uno modo, iudices, saepe multorum improbitate depressa
veritas emergit et innocentiae defensio interclusa respirat,
quod aut ei qui in fraude10 callidi sunt non tantum audent
quantum excogitant, aut ei quorum eminet audacia atque
proiecta est a consiliis malitiae deseruntur. quod si aut
confidens astutia aut callida esset audacia, vix ullo11 obsisti
modo posset12. Vtrum13 furtum factum non est? at nihil
clarius Larini14. an ad Stratonem suspicio non pertinuit?
at is et ex serrula insimulatus et a puero conscio est
indicatus. an id actum non est in quaerendo? quae
fuit igitur15 alia causa quaerendi? an id quod vobis
dicendum16 est, et quod tum Sassia dictitavit: cum de
furto quaereretur, tum Stratonem isdem in tormentis
dixisse17 de veneno?
[184]
hem18 hoc illud est quod ante dixi:
mulier abundat audacia, consilio et ratione deficitur. nam
tabellae quaestionis plures proferuntur quae recitatae vobisque19
editae sunt, illae ipsae20 quas tum obsignatas esse dixit;
in quibus tabellis de furto nulla littera21 invenitur. non venit
in mentem primum22 orationem23 Stratonis conscribere de
furto, post aliquod dictum adiungere24 de veneno quod non
percontatione quaesitum sed per dolorem25 expressum videretur?
quaestio de furto est, veneni iam suspicio26 superiore
quaestione sublata; quod ipsum27 haec eadem mulier
iudicarat quae, ut Romae de amicorum sententia statuerat
satis esse quaesitum, postea per triennium maxime ex omnibus
servis Stratonem illum28 dilexerat, in honore habuerat,
commodis omnibus adfecerat.
[185]
cum igitur de furto quaereretur,
et eo furto quod ille sine controversia fecerat, tum
ille de eo quod quaerebatur verbum nullum fecit? de
veneno statim dixit, de furto si non eo loco quo debuit, ne
in extrema quidem aut media aut aliqua29 denique parte
quaestionis verbum fecit ullum?
Click on a word to bring up parses, dictionary entries, and frequency statistics
1 denuo Halm: denique codd.
2 at Lambinus: et codd.
3 servis habebatur add. codd., ego delevi (cf. § 89)
4 habuisses σψ2a: habuisset Mμ
5 L. om. a
6 ceterorum ςa: et ceterorum Mμ
10 in fraude scripsi: in fraudem ςs: ad fraudem Mμ
11 ullo iis a (contra B)
13 utrum verum a
15 igitur alia σψ2a: alia igitur cett.
16 vobis dicendum ςa: dicendum vobis Mμ
17 Stratonem... dixisse αa: Strato... dixit Mμ
18 hem scripsi: item αa: en Mμ
19 vobisque Angelius: nobisque Mμa
21 nulla littera αa: littera nulla Mμ
23 orationem Mμ: in ratione ς: in oratione b2ψ2s: fort. narrationem
24 aliquod dictum adiung. ςa: aliquid (-quod ψ2) adiung. dictum Mμ
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.