[15]
quid? hoc in Apolloniensi Aristodamo, quid? in Leonte
Imacharensi1 non idem fecisti? quid? iste motus servitiorum
bellique subita suspicio utrum tibi tandem diligentiam
custodiendae provinciae an novam rationem improbissimi
quaestus attulit? Halicyensis Eumenidae, nobilis hominis
et honesti, magnae pecuniae vilicus cum impulsu tuo insimulatus
esset, HS LX a domino accepisti, quod nuper
ipse iuratus docuit quem ad modum gestum esset. ab
equite Romano C. Matrinio absente, cum is esset Romae,
quod eius vilicos pastoresque tibi in suspicionem venisse
dixeras, HS DC2 abstulisti. dixit hoc L. Flavius, qui tibi
eam pecuniam numeravit, procurator C. Matrini, dixit ipse
Matrinius, dicit3 vir clarissimus, Cn. Lentulus censor, qui
Matrini honoris causa recenti negotio ad te litteras misit
mittendasque curavit.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.